O arquitecto Jaime Garrido recibe o premio Laxeiro

Arquitecto, urbanista ou membro fundador do Instituto de Estudos Vigueses son algúns dos méritos que lle valeron a Jaime Garrido facerse co Premio Laxeiro 2017. A fundación que leva o nome do pintor fíxolle entrega a este activista vigués do galardón no xantar de homenaxe que se celebrou o pasado venres 17 na Cidade Olívica. O xurado que seleccionou o gañador deste galardón, que "recoñece toda unha traxectoria de traballo na potenciación e o enriquecemento da nosa cultura" apuntou que o galardoado resulta "unha personalidade imprescindible na revisión do noso patrimonio arquitectónico, unha voz, sempre erudita e crítica que contribúe de forma decisiva ao noso enriquecemento cultural", segundo recolle La Voz de Galicia.