O Museo de Arte Contemporánea (MARCO) de Vigo inauguraba o pasado venres o proxecto Alén dos xéneros. Prácticas de arte feminista en Galicia. A iniciativa, coproducida en colaboración co Auditorio de Galicia propón, a través da obra de cincuenta artistas un "panorama das prácticas artísticas feministas en Galicia dende os anos noventa ata a actualidade". Ánxela Caramés comisaria unha exposición que, segundo explica o centro "permite contextualizar o traballo artístico que aborda as cuestións de xénero, poñendo en relación o ámbito galego co estatal e internacional. Ofrece unha revisión das prácticas feministas realizadas tanto por mulleres coma por homes e, á súa vez, tende pontes entre as producións artísticas e os movementos sociais e políticos reivindicativos, como os grupos activistas feministas e LGTBQI. A mostra indaga e afonda na pluralidade de aspectos da arte feminista e dá visibilidade a xeracións máis novas, vinculándoas coa obra de artistas cunha traxectoria máis consolidada".
A mostra estará aberta ata o vindeiro 11 de xuño e conta con traballos de Xoán Anleo, Lara Bacelo, Luz Darriba, Mar Caldas, Xisela Franco, Ana Gesto, Carme Nogueira, Uqui Permui, María Ruído ou Neves Seara entre outros.
