A Casa da Cultura Ramón Martínez López de Boiro acollerá o 25 e 26 de febreiro o XI Encontro Arqueolóxico do Barbanza, que este ano aborda, entre outros relatorios, as novidades en varios sitios arqueolóxicos intervidos nos últimos anos. Deste xeito, Carlos Rodríguez Rellán falará sobre as escavacións de Chan do Cerqueiro e Coto do Espiño, preto da aldea boirense de Moimenta, Rafael Rodríguez explicará novos datos ao redor do castro do monte Trega, Javier Luaces dará conta do sitio arqueolóxico do Mercado dos Mouros, en Valga (Pontevedra) e os arqueológos Emilio Ramil e Eduardo Breogán Nieto falarán do castro e castelo do Casón, en Ortigueira. Canda eles, participarán especialistas do ámbito español con conferencias ao redor da expansión comercial fenicia ou a pintura paleolítica. A inscrición nas xornadas é de balde.
