O Culturgal leva a Pontevedra máis de 120 actividades

O Pazo da Cultura de Pontevedra acollía onte a presentación do programa de actividades do Culturgal 2016. A Feira das Industrias Culturais achegará a este espazo máis de 120 actividades entre os vindeiros 2 e 4 de decembro. Entre as propostas, destaca a especial importancia que teñen as dedicadas ás crianzas, como os novos traballos de Maria Fumaça e Pablo Díaz, un espazo para Parkour, contacontos ou obradoiros. A nivel musical, a Orquestra Folk Sondeseu correrá cun concerto inaugural no que contarán con Orfeón Treixadura e Rosa Cedrón. O espectáculo central correrá a cargo de Budiño, que conmemora os 20 anos do seu disco Paralaia coa presenza de Mercedes Peón no escenario. En canto a literatura, autores como Inma López Silva, Xosé Monteagudo, Antón Riveiro Coello ou Ledicia Costas presentarán novidades e participarán en diferentes coloquios.



Nesta ocasión, a arte estará representada coa exposición Pegadas na terra na que 18 creadores amosan diferentes xeitos de se achegar á natureza. Paula Cabaleiro e Antón Sobral comisarían un proxecto que integra escultura, instalación, fotografía, vídeo, pintura e debuxo. As entradas ao evento mantéñense en 2 euros para adultos e 1 para crianzas, con posibilidade de bonos para os tres días.