O audiovisual busca mercado en Cannes

Once produtoras galegas acoden á maior feira de contidos para televisión do mundo

Coa produción de series e contidos audiovisuais para televisión no seu punto álxido, caseque convertido en fenómeno, ábrese hoxe na localidade francesa de Cannes o maior mercado mundial destes contidos e alí estará presente a industria galega a través da delegación comercial ‘Films from Galicia’. Once produtoras e máis a Axencia Galega de Industrias Culturais representan alí o noso audiovisual en forma de series e películas para televisión a través do programa de promoción exterior da industria audiovisual galega que desenvolve Agadic xunto co Instituto Galego de Promoción Económica (Igape) co obxectivo de favorecer a procura de compradores e socios internacionais para as producións e coproducións galegas. Calcúlase que MIPCOM move a máis de 2.400 compradores de contidos de todo o planeta. Control Z, CTV, Ficción Producciones, Filmanova, Maruxiña Films, Portocabo, Produtora Faro, R, Treeline Distribution, Voz Audiovisual e Zenit TV participan desde hoxe neste mercado promovendo as súas producións.

É o caso de ’Vidago Palace’, unha serie de Portocabo, que está xa en proceso de rodaxe como coprodución entre Televisión de Galicia e a RTP portuguesa. Portocabo tamén presenta no MIPCOM outra coprodución, ‘Os fillos do sol’, neste caso xunto á empresa catalá Diagonal TV para TVG e Televisió de Catalunya. Pola súa banda, Ficción Producciones participa en Cannes con ‘Tutu’, entre outros proxectos, unha serie de animación. O resto das compañías acoden tamén cos seus últimos produtos e/ou proxectos, como a serie ‘Fontealba’ de Zenit TV. Moitos deles figuran, así mesmo, na última edición do catálogo ‘Films from Galicia’, que a AGADIC está a difundir no Palacio de Festivais de Cannes, desde o espazo dedicado ao audiovisual de Galicia dentro do pavillón Audiovisual from Spain, promovido polo Instituto de Comercio Exterior (Icex).