A Consellaría de Cultura presenta Galicia Culturea

A praza das Praterías, en Compostela, acollía esta mañá a presentación de Galicia Culturea. O novo programa da Consellaría de Cultura integra actividades desenvolvidas polos diferentes departamentos desta entidade, a incluír a Axencia Galega das Industrias Culturais, a Secretaría Xeral de Política Lingüística ou a Fundación Cidade da Cultura. Segundo anunciou o conselleiro, Román Rodríguez, a iniciativa levará preto de 300 actuacións escénicas, musicais ou de narración oral, así como obradoiros, a un total de 166 concellos do país. Coa maior parte destas actividades a se desenvolver ao ar libre, Román sinala que a consellaría pretende "darlle un impulso ao carácter cultural do verán galego", con propostas que suman unha "vocación educativa e formativa" ao ocio. O programa, que comeza este mesmo mes de xuño, desenvolverase ata finais de setembro.