Un encontro internacional analiza os traballos de restauración do Pórtico da Gloria

Presentar os resultados obtidos polos equipos que desde 2008 estiveron a traballar na restauración do Pórtico da Gloria e debater novas propostas sobre a limpeza e consolidación da policromía en escultura de pedra, o desenvolvemento de plataformas dixitais interactivas para o procesado e visualización de datos ou o emprego de novas tecnoloxías para a restitución virtual das policromías históricas. Estes son algúns dos obxectivos do II Simposio Internacional Andrew W. Mellon: O esplendor do Pórtico da Gloria: conservación, policromía e a transfiguración da materia que comeza mañá na sede do Consello da Cultura Galega, en Compostela e que se desenvolverá ata o xoves 8 de xullo.

A iniciativa que coordinan conxuntamente as fundacións Barrié, Catedral e Andrew Mellon conta coa presenza de especialistas internacionais no campo da conservación do patrimonio, como é Timothy P. Whalen director do Getty Conservation Institute de Los Angeles, Narayan Khandekar director do Straus Center for Conservation and Technical Studies, George Wheeler (Director of Conservation, Historic Preservation Program, Graduate School of Architecture, Planning and Preservation, Columbia University) ou Ingrid Geelen do Royal Institute for Cultural Heritage de Bruxelas.