A mostra (S8) dedica a súa sétima edición aos Novos Impresionistas

Os novos impresionistas é o lema da sétima edición da (S8), a mostra de cinema periférico da Coruña. Entre o 1 e o 8 de xuño vindeiros, o programa deste evento achegará unha selección de cineastas emerxentes e veteranos "para os que a experimentación coa luz e as calidades pictóricas do cine é esencial. Investigando os límites da percepción sensorial e da subxectividade, este grupo de cineastas asinan algunhas das obras visualmente máis estimulantes dos últimos anos". Jacques Perconte,Stephen Broomer, Jodie Mack e Robert Todd, o arxentino Pablo Mazzolo, os canadenses John Price, Alexandre Larose e Eva Kolcze ou a británica Charlotte Pryce, así como Germaine Dulac son nomes que fan parte da nova xeira do encontro. Para a gala inaugural proxectarase unha versión restaurada do clásico de Sergei Eisenstein, Acorazado Potemkin que contará con música ao vivo a cargo do pianista e compositor Chris Jarrett.

Pola súa banda o Festival Internacional de Curtas de Bueu (FIC Bueu) anunciaba que para a súa vindeira edición recibiu 1.461 producións de 97 países. Destas, 31 son galegas, o duplo do que na anterior edición. A novena xeira deste evento, que conta por vez primeira co apoio económico da Axencia Galega das Industrias Culturais para a súa realización, desenvolverase entre o 10 e o 17 de septiembre. En total proxectaranse sesenta filmes, dos cales vinte farán parte da sección oficial.