Actuacións e obradoiros a cargo dos magos Fran Rei, o Mago Teto, Dani García e o Mago Paco conforman o programa de Galicia Máxica, un festival dedicado ao ilusionismo que se presentaba este martes. O máis peculiar da iniciativa é que xorde como un proxecto colectivo dos concellos de Allariz, A Rúa, Baños de Molgas, Barbadás, Verín e Viana do Bolo coa coordinación do Mago Teto e de Culturactiva. As actuacións distribuiranse entre o 1 e o 17 de abril polo territorio dos seis municipios.
Para alén dos espectáculos dos catro magos, o programa inclúe tamén un ciclo formativo de obradoiros de ilusionismo para grupos de vinte rapaces, e ten unha vertente social que inclúe actuacións en asilos e centros da terceira idade, para achegar os espectáculos a novos públicos.
