O Padroado da Cultura do Concello de Narón e a produtora Eme2 coordinan a primeira edición de Singular, un novo festival dedicado integramente ao monólogo teatral. O encontro, que se daba a coñecer onte en Compostela, pretende "potenciar as propostas dramáticas unipersoais e misturar a tradición teatral, a innovación dramatúrxica e os alicerces do monólogo humorístico". José Antonio Touriñán abre o programa esta fin de semana con dúas sesións do Monólogo do imbécil os días 1 e 2, unha estrea que continuará en vindeiras datas xira por Galicia. A cita continuará o día 8 con Arte de las putas, una historia de amor a cargo de José L. Esteban, Celso Sanmartín o 15 de abril e Riki López con Me tengo contento o día 22 deste mesmo mes.
