Foi un pioneiro na química orgánica no noso país e traballou na obtención de produtos naturais a partir de especies vexetais autóctonas. No seu haber figura a descuberta de substancias que bautizou como coruñina, santiaguina, orensina ou pontevedrina e o ter colaborado na creación da empresa Zeltia. Ignacio Ribas Marqués será o investigador homenaxeado no vindeiro Día da Ciencia en Galicia. A Real Academia de Ciencias daba a coñecer a conmemoración, que se celebrará o vindeiro 8 de outubro e que coincide cos vinte anos do falecemento de Ribas. A Academia anuncia que xa desde este primeiro trimestre de ano comezarán as actividades de divulgación sobre esta figura e o seu traballo, para o que contarán coa colaboración das institucións científicas vinculadas ao investigador e da Fundación Barrié.
