A Real Academia Galega de Ciencias (RAGC) anunciaba onte que o químico Tomás Batuecas Marugán será o homenaxeado este ano no Día da Ciencia en Galicia. A totalidade dos membros desta institución apoiaron a proposta que recoñece a importancia deste investigador "como referente internacional na determinación dos pesos atómicos dos elementos químicos". Segundo explica a Academia de Ciencias "esta propiedade dos diferentes tipos de elementos que forman a materia é fundamental para orientar e manexar as súas aplicacións en innumerables campos do coñecemento e da industria". A conmemoración coincide ademais coa celebración dos 150 anos da creación da Táboa Periódica dos Elementos Químicos. O Día da Ciencia en Galicia celébrase cada 8 de outubro.
Batuecas, nado en 1893, publicou 139 traballos científicos, dos que arredor de 50 foron difundidos por revistas internacionais de primeiro nivel. Segundo explica a Academia, "neles queda constancia dos esforzos do químico da USC por afinar todo o posible diversos métodos de determinación rigorosa de masas atómicas. Grazas a estes, el e o seu equipo conseguiron especificar as de varios elementos: o aluminio, o magnesio, o silicio, o sodio, o potasio, o arsénico e o plomo".
