O Teatro Rosalía de Castro acolle na noite de mañá, cunha segunda sesión o domingo 7, a estrea de Zugunruhe. ArtesaCía presenta este novo espectáculo, que toma o seu título do termo alemán que nomea a ansiedade dos paxaros á hora de emigrar. A compañía emprega unha experiencia inmersiva, que inclúe videomapping, creación sonora, e vídeo en 360 grados para contar a historia de tres personaxes atrapados nun aeroporto e con pantallas como única conexión co exterior. O proxecto xorde dunha residencia técnica que ArtesaCía desenvolveu no propio Teatro Rosalía e doutra artística que tivo lugar na Fundación Seoane, onde tamén se poderá ver o espectáculo os vindeiros días 8 e 9. O Concello da Coruña xa anunciou a súa intención de continuar a apoiar residencias deste tipo nos vindeiros meses.
