Imaxe de Interaccións, de Vallhonrat
Dúas exposicións enfocadas na fotografía compoñen a oferta do Centro Galego de Arte Contemporánea para este outono. Na tarde de onte abría as súas portas Interaccións de Javier Vallhonrat. O último proxecto do fotógrafo amosa 52 fotografías, sete vídeos e unha videoinstalación centradas en paisaxes de alta montaña e de meteoroloxía extremas, fiando un relato que, segundo explica a presentación da mostra, "pódese entender como unha exploración sobre a experiencia da montaña, a fraxilidade do home fronte á natureza e as condicións extremas, pero tamén como un cuestionamento sobre diferentes modos de representación da paisaxe".
A exposición, que estará aberta ata o vindeiro 27 de marzo, coincide no centro ata o vindeiro 15 de novembro con Arrissa. A sombra e o fotógrafo 1922-1936. Este proxecto recupera dos fondos da Colección Telefónica unha selección de traballos do catalán Antoni Arissa. Cento cincuenta fotografías realizadas entre 1922 e 1936 amosan a evolución do autor desde o pictorialismo á vangarda.
