Do outro lado das portas é o título do poemario co que o vigués Iñaki Varela Pérez se impuxo no VIII Premio de Poesía Victoriano Taibo-Entidade Local Menor de Morgadáns. Ao galardón, dotado con tres mil euros en metálico e unha escultura, presentáronse un total de corenta e dous orixinais. Segundo destacou o xurado, o poemario gañador é "un libro que trata os temas máis actuais dende unha perspectiva social, nunha especie de épica actual, en que o autor nos dá a súa particular visión do que nos preocupa hoxe sen que os poemas se resintan na súa construción lírica".
En paralelo, a Asociación Cultural Ergueitos de Sarria prepara para os días 1, 2 e 3 de outubro os actos de homenaxe a Fiz Vergara Vilariño. Ademais dun roteiro literario, o programa inclúe a entrega do XV premio poético que leva o nome deste autor a Charo Lopes. A poeta fíxose co galardón o pasado mes de xuño polo seu poemario De como acontece a fin do mundo. No marco destas xornadas tamén se presentará Oenach de Marcos Abalde, obra premiada na anterior edición do certame.
