O sábado o monfortino Pazo de Tor acolleu a inauguración da mostra "Coma na casa. Relatos creativos sobre o fogar expandido", comisariada por Chus Martínez e na que participan destacados artistas contemporáneos como Mónica Alonso, Marta Bran, Mónica Cabo, Bosco Caride, Clara Cerviño, Andrea Costas, David Crespo Fernández, Victoria Diehl, entre outros. A escritora Anxos Sumai realizará os textos do catálogo. "É unha proposta ideada coa intención de fuxir dos espazos e canles convencionais destinados á arte contemporánea, seguindo a estela de importantes experiencias realizadas na Casa de García Lorca en Málaga ou a casa de Sigmund Freud en Viena", sinala Chus Martínez. A mostra poderase ver ata o 28 de xullo.
