Mónica Cabo inaugura o ciclo Problemáticas no MARCO

Desde esta tarde e ata o vindeiro 26 de xuño pode verse no anexo do Museo de Arte Contemporánea de Vigo (MARCO) a exposición There Will Be a Sea Battle Tomorrow. Mónica Cabo amosa catro pezas "que existen nunha eventualidade que actúa fóra, contra e desde cada obxecto. A escultura, unha bicicleta ensimesmada na súa duplicidade especular; o vídeo coa escena dun secador pendurado do seu cable que bate de lado a lado cando se activa; o andamio, instalado sobre pequenas peañas de madeira, serve de corpo para colgar un pano de tea". O título da mostra, tomada dunha proposición de Aristóteles, xoga coa idea da posibilidade e do futuro continxente. A coincidir coa exposición, a artista protagonizará un coloquio coa comisaria, Chus Martínez Domínguez, as 19:30 horas desta tarde.

A mostra inaugura o ciclo Problemáticas. Artistas no relato incompleto que comisaria Chus Martínez Domínguez e que pretende reflexionar, a través do traballo de cinco creadoras de distintas disciplinas e xeracións, sobre "os espazos nos que demasiadas veces operan as creadoras; nas marxes, na resistencia, nos cantos do sistema". Pascuala Campos de Michelena e Ana Gallego Palacios, Xisela Franco e mais Elena Blasco serán os outros nomes que protagonizan o proxecto.