Luís Seoane chega a Vigo con Retrato de esguello

Trescentas pezas que percorren cincuenta anos da traxectoria artística de Luís Seoane. Esta é a proposta que inaugura hoxe o Museo de Arte Contemporánea (MARCO) de Vigo. Retrato de esguello é unha exposición coproducida coa Fundación Seoane e comisariada por David Barro que inclúe "pinturas, debuxos, gravados, acuarelas, tapices, obra cartelística, bosquexos murais,deseños cerámicos, publicacións, poesías, así como o seu labor de comunicador e militante cultural". Todo un resumo do traballo dun dos creadores galegos máis recoñecidos internacionalmente que se pode ver ata o vindeiro 27 de setembro. A inauguración, que se realizará ás 18:30, inclúe unha conferencia de Barro a contextualizar a traxectoria do creador.