Tres meses despois de que a colección Álvaro Gil voltase ao Museo de Lugo, o Consello da Xunta de Galicia completaba onte o proceso da súa declaración como Ben de Interese Cultural. O Goberno Galego acordou outorgarlle a máxima protección legal ás 44 pezas de ourivería da xoiaría pre e protohistórica do noroeste peninsular, cunha importante presenza de pezas castrexas que achegan un destacado coñecemento sobre este periodo histórico.
Na súa decisión, o Consello da Xunta contou con informes favorables da Real Academia Galega de Belas Artes da Nosa Señora do Rosario, do Consello da Cultura Galega e da Facultade de Xeografía e Historia da Universidade de Santiago.
