Que nos pasa coa música?

Vale, hai crise. Pero observen estas cifras. En 2013 asistiron a concertos de música popular (pop, rock, electrónica, etc.) en Galicia pouco máis dun millón de espectadores (en todo o ano). Isto é un 14,3% menos que no ano anterior, un 46.3% menos que en 2010 e, mesmo se nos vamos a doce anos antes, a 2001, as cifras son un 28.1% máis baixas. Na música clásica, a unha escala moito menor, acontece case o mesmo, pero en peor. A cifra de espectadores de concertos de clásica, máis de 238 mil afeccionados, supón unha caída dun 29% en relación ás cifras de 2001.

Así o revelan os datos do último informe do Observatorio da Cultura Galega do Consello da Cultura, que atende tanto á música clásica como á popular, atendendo a fontes moi variadas, com os Anuarios da SGAE, a base de datos de recuros da o Instituto Nacional das Artes Escénicas e da Música, o Ministerio de Cultura ou os Institutos Galego e Español de Estatística.

A isto agregámoslle que a recadación en Galicia é moito menor que na media española: os datos amosan que a media de espectadores por concerto de pago de música clásica en Galicia foi de 360,9, é dicir 161,6 menos que no conxunto de España. O prezo medio da entrada en Galicia é moi competitivo foi de 8,7 euros, cando no conxunto do Estado é de case o dobre, de 15,1 euros. Galicia é a terceira comunidade autónoma cos prezos máis baixos dos concertos de música clásica.

Os xéneros máis populares
Chama a atención o interese que esperta o pop-rock en Galicia; asistiron máis de 700.000 asistentes, o cal significa un 72,7% do total, nunha cifra que supera a media global española, nun 70,4%, e conseguindo o 84% da recadación dos espectáculos de música ao vivo en Galicia (4,6 millóns de euros). A música folk, de tanto peso en Galicia, é o segundo xénero máis escoitado, que atrae ao 5,7% do público, tres puntos por riba da media española pero tamén a enorme distancia doutras comunidades, onde funciona moito mellor que en Galicia, caso de Asturias, cun 30,1% do público total, a rioxa, (15,5%) e Navarra (6,7%). Con cifras máis baixas, aos galegos gústalles asistir a concertos de jazz, blues, soul ou música latina.

Aínda así, o ámbito da música é o grupo de ocupacións culturais con máis emprego, aínda que sexa moi estacional (o verán) e cunha leve tendencia á baixa, realizánsdose en 2014 22.189 ciontratos. A comarca galega con máis contratación é Caldas. O feito de que empresas moi fortes do país, como Espectáculos Lito, estean radicadas nesta vila pontevedresa, algo terá que ver.