O presidente da Xunta de Galicia, Alberto Núñez Feijóoo e mais o presidente da República Portuguesa, Aníbal Cavaco Silva, asinaron esta mañá na sede da Real Academia Galega o Memorando de Entendemento para a Adopción do Portugués como Lingua Estranxeira de Opción e Avaliación Curricular no Sistema Educativo Non Universitario da Comunidade Autónoma de Galicia. Este acordo, que se desenvolverá entre o Instituto Camões e a Xunta de Galicia facilitará a cooperación entre institucións tanto na formación de docentes como para implementar o ensino de portugués, ademais de recoñecer oficialmente o nivel que obteñan os alumnos nos seus estudos.
Con esta sinatura, a Xunta comeza a desenvolver o disposto na Lei Paz Andrade para incorporar progresivamente a ensinanza da lingua de Alén Miño no ensino secundario. Na actualidade 861 alumnos de 32 centros de Secundaria e 1.122 das Escolas Oficiais de Idiomas aprenden portugués.
En paralelo a este acordo, entre os días 23 e o 28 celébrase en Braga a primeira edición da Semana Cultural Convergências Portugal-Galiza, que contará coa presenza de Uxía, Narf e o escritor e presidente da Fundación Rosalía de Castro, Anxo Angueira.
