Francisco Mantecón é o nome que abre a programación do MARCO de Vigo para 2015. O Museo de Arte Contemporáneo presentaba esta mañá as súas propostas para o ano, entre as que destaca tamén a mostra Movementos universais dedicada a Luís Seoane (a partir de xuño) ou a colectiva Port Authority, con traballos de Gintaras Didžiapetris con AaBbPp, Elena Narbutaitė, Rosalind Nashashibi e William Eggleston. Como novidade, o MARCO abre unha sala para proxectos na súa antiga tenda, onde se programará o ciclo de mostras Intertextual de Ángel Calvo Ulloa. Este mesmo espazo albergará, a partir do 16 de xaneiro, a exposición 249 litros de Carlos Maciá.
Como está a ser habitual nos últimos anos, o centro acollerá tamén unha mostra dos traballos que recibiron bolsas DKV e o proxecto gañador do premio MARCO/FRAC Lorraine/SFKM para novos comisarios, que desta volta foi A voz do tradutor de Martin Waldmeier.
