Port Authority leva o almacén ás salas do MARCO

Como a proposta máis conceptual da nova temporada, o Museo de Arte Contemporánea (MARCO) de Vigo abría esta fin de semana Port Authority. Comisariada por Agar Ledo e coproducida co Musée d'Art Contemporain de Bordeaux, o proxecto parte dos traballos do lituano Gintaras Didžiapetris e mestúraos con pezas de AaBbPp, Elena Narbutaitė, Rosalind Nashashibi e William Eggleston. A idea é traballar a exposición "como un lugar onde as ideas, obxectos ou seres se entrecruzan; un proxecto onde se exploran situacións de transferencia ou intercambio". Arquivos, fotografías, debuxos, filmes e obxectos que non se identifican cun medio concreto fan parte deste proxecto que se pode visitar ata o vindeiro 17 de maio e que fai do Museo "unha especie de depósito, un lugar a modo de almacén onde os obxectos repousan antes de ser distribuídos", segundo explica a presentación da mostra.