Gravaron un único disco en 1978 e foron pioneiros do rock progresivo cantado na nosa lingua. O grupo N.H.U. ve recoñecido agora o seu labor co Premio Honorífico da segunda edición dos Premios Martín Códax da Música. O galardón, que organiza a asociación Músicos ao Vivo, apunta que o grupo foi un "proxecto musical avanzado ao seu tempo, aglutinador dunha xeración de músicos inquedos, inconformistas e entregados a un proxecto minoritario, underground e carente de referentes próximos".
Canda a este galardón, o vindeiro 17 de decembro coñeceranse nunha gala en Pontevedra o resto dos gañadores desta segunda edición. Segundo apunta a organización, un total de 356 proxectos musicais galegos participan no certame. Entre seleccionaranse, mediante votación do propio sector, 54 finalistas e, nunha segunda rolda, os gañadores en cada unha das quince categorías e mais nos premios Organistrum, dedicados a salas, festivais e espazos de comunicación musical.
