Co centenario do achado do Pergamiño Vindel como eixe, Vigo celebra por segundo ano consecutivo a súa Noite Branca. Os centros da Rede Museística da cidade (Quiñones de León, Verbum-Casa das Palabras, Pinacoteca Francisco Fernández del Riego, Casa Galega da Cultura, Casa das Artes, Fundación Laxeiro, MARCO, Museo Liste e Centro de Artesanía Tradicional) abrirán na noite do venres 8 de agosto ata as 2 da mañá incorporando visitas guiadas, concertos e actividades á súa programación.
A iniciativa inclúe tamén os concertos O segredo do pergamiño Vindel: 100 anos de música para as cantigas a cargo do grupo Sanfonetto. A interpretación irá acompañada do relato da historia deste documento que revolucionou o coñecemento sobre a lírica medieval galega. Os concertos serán ás 21:00 h no Pazo-Museo Quiñones de León e ás 23:00 h no salón de actos do Verbum.
