As produtoras audiovisuais poden solicitar a partir de mañá as subvencións para o desenvolvemento de proxectos audiovisuais en lingua galega deste ano. O Diario Oficial de Galicia publica hoxe a convocatoria da Axencia Galega das Industrias Culturais, que destina un total de 175.000 euros (25.000 este ano e 150.000 en 2015) a este fin. As axudas estás dirixidas a proxectos de longametraxes de ficción e animación, longametraxes e miniseries para televisión e mais pilotos de series e programas para televisión, e teñen unha contía máxima de 20.000 euros. Os interesados en participar na convocatoria dispoñen dun mes a partir de mañá para facer as súas solicitudes. A contía desta liña de axudas increméntase este ano en 25.000 euros a respecto da anterior convocatoria.
