Os últimos traballos de Rubín e Ríos para EEUU sairán en castelán

Dúas obras realizadas por autores galegos de banda deseñada para editoras estadounidenses verán a luz o vindeiro mes de novembro en España. Debolsillo publicará El momento de Aurora West, tradución do primeiro dos dous volumes da serie que o ourensán David Rubín realizou con guión de Paul Pope e JT Petty para o selo First Second Books. Pola súa banda, o selo vaco Astiberri editará Bella Muerte, volume que compila a serie que debuxou para Image a arousá Emma Ríos con guión de Kelly Sue. Precisamente polo seu traballo nesta serie a autora galega está nominada nos Premios Eisner nas categorías de mellor debuxo e entintado e mais na de mellor capa.