A serie coa que Emma Ríos acadou a súa nominación aos premios Eisner, Pretty Deadly, publicada en Estados Unidos por Image, sairá en castelán da man da editora Astiberri. A publicación, segundo confirmou a propia autora, verá a luz o vindeiro outono nunha edición cargada de extras. Pola súa banda, Manolo López Poy e Miguel Fernández teñen xa nas librarías italianas a edición nesta lingua de A las cinco de la tarde, traducido como Matador e publicado por Diábolo Edizioni.
Finalmente, o dúo Os Bravú (Dea Gómez e Diego Omil) presenta da man da editora Fulgencio Pimentel Toreromaus. A libraría compostelá Kómic acolle este venres 27 de xuño unha sesión de sinatura nas que os autores darán a coñecer o novo traballo, un volume de 32 páxinas en branco e negro que está dispoñible nunha edición limitada de 250 exemplares.
