O suízo Martin Waldmeier, de 30 anos, acaba de se erguer como vencedor na sexta edición do premio MARCO/FRAC Lorraine/SFKM de novos comisarios. O seu proxecto A voz do tradutor impúxose entre as 118 propostas de máis de 34 países que competían polo galardón. O proxecto "explora a cambiante relación entre linguaxe
e identidade no contexto da globalización" e "reflexiona en que medida a crecente necesidade de traducións en todos os niveis da vida social, económica e cultural, pode ser considerada non só un desafío ou unha ameaza, senón tamén unha fonte de creatividade e experiencia, e ao mesmo tempo lugar de actividade subversiva e crítica".
O xurado estaba composto por Beatrice Josse, directora do FRAC Lorraine, Ingrid Norum, comisaria do SFKM e Iñaki Martínez Antelo, director do MARCO. Os tres centros amosarán nos vindeiros meses o proxecto galardoado.
