A Xunta achegará menos cartos para normalización nos concellos

Continúan os descensos nos fondos destinados á normalización da lingua. O Diario Oficial de Galicia recolle hoxe a convocatoria de axudas que a Consellaría de Cultura distribúe entre as entidades locais do país para a promoción do uso da lingua galega. En total serán 300.000 euros, 100.000 menos do que no pasado ano, os fondos que se distribuirán entre os concellos interesados. Aínda que estar integradas na Rede de Dinamización Lingüística promovida desde a Consellaría non é imprescindible si que se valora a participación das administracións locais nesta entidade.

A liña de axudas, que se interrompera en 2011, está a sufrir desde 2012 sucesivos recortes e pasou do 520.000 euros dese ano aos 300.000 da actualidade.