O autor de Os noivos e fundador da lingua italiana moderna, Alessandro Manzoni, protagoniza a XII edición das Xornadas Literarias de Neda. O Campus de Esteiro, en Ferrol, e mais a Casa das Palmeiras de Neda acollen entre o 23 e o 25 de abril os actos deste encontro, que contará coa presenza de investigadores como Giovanni Albertocchi, José Manuel Sande ou o tradutor Xavier Rodríguez Baixeras. Ademais, proxectarase I promesi sposi, de Mario Camerini e poderá escoitarse un concerto de música do século XIX a cargo do violinista Enrique Agrelo e do pianista Andrés Pazos.
