Chévere homenaxea os vinte anos das ultranoites con Viaxe ao país dos ananos

Tomando como nome un dos poemarios máis coñecidos de Celso Emilio Ferreiro, Viaxe ao país dos ananos, Chévere quere celebrar os vinte anos das Ultranoites. O xénero inventado por esta compañía, que xunta teatro e música con moito humor e irreverencia, é un clásico na oferta cultural que ofrece esta compañía. Desta volta a ultranoite ten formato de espectáculo para reflexionar sobre a historia recente de Galicia. O espectáculo ten unha estrea informal no seu espazo de residencia (o auditorio da Ramallosa, Teo) o vindeiro 31 de marzo ao que regresará a partir do 25 de abril.

Chévere volve apostar por un espectáculo de gran formato con seis actores (Patricia de Lorenzo, Arantza Villar, Mónica García, Miguel de Lira, Xesús Ron e César Goldi en substitución dun lesionado Manuel Cortés) e tres músicos (Xacobe Martínez, Max Gómez e Manu Cebrián). O seu formato de traballo é o habitual, partir de ideas para ir perfilando un espectáculo que non goza de texto escrito.

Segundo publica Alberto Ramos en Praza, o director Alfonso Zarauza está a realizar "un documental sobre a compañía e o seu traballo".