Excéntricas aposta por Roland Topor na súa nova montaxe

O Teatro Principal de Compostela acolle este 16 de xaneiro a montaxe de Da Vinci tiña razón, o novo proxecto de Producións Teatrais Excéntricas sobre un texto de Roland Topor. Quico Cadaval dirixe un elenco composto por Evaristo Calvo, María Costas, María Garat, Víctor Mosqueira, Santi Romay e Ana San Martín nunha obra que se burla da comedia burguesa desde a perspectiva dun dos membros do coñecido grupo Pánico. Na representación a idílica estancia nunha casa de campo vese alterada cando o baño se atasca e comezan a fluír os desperdicios. A obra poderá verse na capital galega ata o vindeiro domingo 19.