Cadaval trae de novo a Shakespeare á escena galega con 'Medida x Medida'

O FIOT de carballo acolle hoxe a volta dunha obra de Shakespear ás táboas galegas da man de Quico Cadaval. Medida x Medida é unha coprodución da compañía Producións Teatrais Excéntricas e o propio FIOT na que Cadaval dirixe e adapta o libreto de Measure for measure escrito en 1603 por William Shakespeare. Melania Cruz, Patricia Vázquez, María Costas, Josito Porto, Santi Romay, Evaristo Calvo e Víctor Mosqueira compoñen o reparto da obra que hoxe e mañá se poderá ver en Carballo e que posteriormente inciará a súa xira de salas no Teatro Principal de Pontevedra o día 10 de outubro, ao seguinte día 11 estará en Arteixo no Centro Cívico e Cultural, o día 12 na Casa da Cultura de Muros e O Barco de Valdeorras o 29 de novembro, son as datas confirmadas.

A historia de Medida x Medida acontece en fidelidade co escrito por Shakespeare nunha Viena surrealista onde mandatario Duque Vincenzo pasa á clandestinidade e manda aplicar con todo rigor a lei contra os comportamentos inmorais. Cai a lei por igual sobre o negocio do sexo e sobre a xuventude hedonista. Un xoven de boa familia é condenado a morte. Isto obriga a Isabella, a sua irmá monxa, a abandonar o convento por tres dias coa tentativa de salvar a vida do seu pecadento irmán. Un mundo de vicio, perversidade e corrupción tentarán lixar a súa brancura virxinal. Palacios, cadeas e arrabaldes serán o labirinto que percorre Isabella na súa carreira contra a morte. Todo observado dende as sombras por un Duque Vincenzo, irrecoñecíbel baixo o hábito de frade mendicante. A escenografía e o vestiario serán de Suso Montero, que colabora de novo con Excéntricas tras A Cabeza do Dragón, a dirección musical de Bernardo Martínez e o deseño de iluminación de Dani Juncal.