Catro colectivos lugueses reclaman a protección do hipocausto romano de Burela

O Colectivo Cultural Buril, a asociación Cultura do País, ADEGA e Mariñapatrimonio presentaron unha reclamación a Patrimonio da Xunta de Galicia para denunciar o "lamentable estado de degradación e abandono" no que se atopa o xacemento arqueolóxico de Castrelo, en Burela. Neste sitio arqueolóxico localizouse un hipocausto, un sistema de calefacción romano empregado para calefactar estancias ou balnearios. As catro asociacións denuncian o total abandono do sitio arqueolóxico, a súa falta de protección que está a motivar sustraccións do material e mesmo a súa conversión en entulleira. Os restos, segundo as asociacións, están "nun total estado de degradación".