Galicia Escena Pro achegará 22 espectáculos a Compostela

Serán 22 espectáculos, dez completos e doce en formato showcase de vinte minutos, os que conforman o programa da primeira edición de Galicia Escena Pro, que se celebra en Compostela entre o 4 e o 6 de novembro. O proxecto que substitúe a antiga Feira de Artes Escénicas achegará a cinco escenarios composteláns dez espectáculos completos dos cales cinco son teatro para adultos, tres infantís, un de danza e outro de novo circo. Nos showcases, sete serán de teatro para adultos, dúas montaxes infantís, dúas de danza e unha de novo circo. O público interesados poderá asistir de balde ás representacións mentres fiquen prazas libres.

A cita profesional que organiza AGADIC pretende converterse nun referente para que os programadores do país poidan coñecer o que se está a facer no eido das artes escénicas e, segundo sinalou o Secretario Xeral de Cultura, Anxo Lorenzo, agarda inserirse no panorama estatal de festivais teatrais. Nesta primeira xeira están inscritos 50 programadores do país.

Na presentación do evento Alfonso Sutil, director de AGADIC e mais Anxo Lorenzo sinalaron que a iniciativa se desenvolveu a partir do diálogo e da colaboración co sector das artes escénicas, e que o festival está aberto a mudanzas na súa duración e formato "con vistas a evolucionar e mellorar", segundo apuntou Lorenzo.