Unha fin de semana festiva celebra os 20 anos do CGAC

O 29 de setembro de 1993 abría as súas portas o Centro Galego de Arte Contemporánea. Desde comezo deste 2013 viñéronse sucedendo exposicións e actividades arredor dos vinte anos do espazo. Na vindeira fin de semana, a coincidir co aniversario, celébrase unha programación especial "para todos os públicos" segundo destacou o director, Miguel Von Hafe, que presentaba o programa en rolda de prensa esta mañá. Unha mesa redonda sobre o edificio de Álvaro Siza, visitas guiadas á colección do centro, roteiros interactivos e a presentación de dúas obras editadas polo centro son algunhas das propostas. No sábado ademais, o CGAC abrirá ata as doce da noite a collerá concertos e Fluzo, Disco Las Palmeras! e mais unha sesión do DJ Bigote Mix.

Ademais, Von Hafe anunciou que para o final de novembro está previsto inaugurar a exposición 93, que recollerá obras de máis de 120 artistas galegos e contemporáneos producidas precisamente no ano de apertura. "Será como un corte histórico no que o visitante emerxe nun contexto cultural específico", sinalou o director.

Como retos para o futuro do centro, o secretario xeral de Cultura, Anxo Lorenzo, destacou na rolda de prensa que o reto para o futuro "é que a cidadanía se apropie do centro, e de todos os museos", mentres Von Hafe salientou a importancia da "continuidade na traxectoria" do CGAC ata hoxe e a necesidade de "atraer máis xente do turismo de Santiago", ao tempo que sinalaba unha tendencia ascendente de visitantes ao centro.