O Auditorio da Universidade de Santiago (USC) acollerá os vindeiros 27, 28 e 29 de setembro e 4, 5 e 6 de outubro a estrea do espectáculo co que Matarile Teatro retorna aos escenarios. Staying Alive é a primeira das producións da compañía de Ana Vallés como grupo residente da USC. A obra contará coa propia Vallés como directora e intérprete, a quen acompañarán Mónica García, Rut Balbís e Nuria Sotelo no escenario. Para marzo de 2014 está prevista a estrea de Teatro invisible,unha produción na que se repasarán as claves escénicas da compañía e que contará con diferentes convidados que actuarán como interlocutores dunha escena.
