Matarile estrea o programa de compañías residentes da Universidade de Santiago

Convidar a unha compañía profesional en calidade de residente, que desenvolva un espectáculo ao tempo que compaxina a súa práctica profesional cun programa didáctico para a universidade. Este é un dos aspectos máis novidosos da renovación do programa formativo da Aula de Teatro da USC. E será a compañía Matarile Teatro, dirixida por Ana Vallés, quen se encargue de estrear este formato para o curso 2013-2014. Canda isto, desenvolveranse dous bloques: un para dirección e outro para a interpretación.