A cinematografía sonora de George Méliès abre o Super8 na Coruña

Hoxe comeza a cuarta edición do Festival de Cinema Super8 da Coruña. Unha cita que ten un arranque moi atractivo co cine-concerto Georges Méliès. Os descendentes do pioneiro cineasta francés ofrecerán unha escolma dos seus filmes, ambientados e sonorizados con narración e improvisacións en vivo. Os traballos foron restaurados pola asociación "Les amis deGeorges Méliès‐Cinémathèque Méliès.” Con el arrincan catro días de traballos independentes e arriscados que se desenvovlerán en varias sedes. Destaca entre elas a Fundación Seoane que exhibirá os traballos de Lois Patiño.

Lois Patiño (Vigo, 1983) ofrecerá a videoinstalación O corpo baleiro, na que con varias láminas de metacrilato suspendidas no aire, atravesadas á súa vez pola luz que emite un vídeo proxector, e acompañadas por unha música emitida a baixa frecuencia, crea un contorno no que se representa un estado a medio camiño entre a vida e a morte, un espazo espectral onde o corpo se baleira de vida. Non é o único proxecto que se exhibe no marco do Super8 neste espazo, que tamén da acubillo a autor galego. Trátase do lucense Miguel Mariño, que exhibirá o film performance Fomos ficando sós, antesala da performance de cine expandido do realizador vangardista arxentino Claudio Caldini coa que se pechará o festival. O certame este ano dedica un ciclo especial ao novo cinema que se está a desenvolver en Arxentina, como país convidado.