O programa Falaredes inicia unha nova edición

O programa da Rede de Dinamización Lingüística para os máis novos, Falaredes, iniciou esta fin de semana a súa edición 2013. Aínda sen desvelar todas as actividades que se integrarán no mesmo, a Secretaría Xeral de Política Lingüística, avanzou que se programarán concertos de Magín Blanco co seu traballo A nena e o grilo nun barquiño, mentres Fantoches Baj ofertará no marco deste programa o espectáculo As pombas de Carboeiro. Desde a Secretaría adiantan que o programa incluirá outras tres actividades, e que pretende chegar a un total aproximado de 150 actuacións por toda a xeografía do país.

Tamén desde a Rede se presentaba esta mañá a proposta Espello deportivo, unha serie de encontros con profesionais como a regatista Sofía Toro, o nadador paraolímpico Chano Rodríguez ou o tirador Antonio Saavedra, nos tres casos medallistas olímpicos. A iniciativa, dirixida a todas as persoas interesadas, terá un total de 36 encontros en diferentes localdiades e pretende contribuír a difundir o emprego da nosa lingua no ámbito deportivo.