Ourense inicia a nova xeira do programa FalaRedes

Un concerto para maiores de cinco anos con poemas musicados de Manuel María a cargo de Uxía, Magín Blanco e Santi Cribeiro. A actividade Todo me fala de ti abría onte en Ourense a nova xeira do programa FalaRedes, que a Secretaría Xeral de Política Lingüística promove para achegar a nosa lingua ao ocio dos máis novos. O Auditorio da Cidade das Burgas acolle este sábado 20 o recital, que ten confirmada outra data para o día 27 en Marín. A xira continuará por A Coruña, Ferrol, Ribeira, Santiago de Compostela, Burela, Vilalba, O Barco de Valdeorras, O Carballiño, Ribadavia, Cangas, A Estrada, Vilagarcía de Arousa e Ponteceso. Para a vindeira semana a Secretaría Xeral de Política Lingüística anunciou que se presentará unha nova actividade no seo deste programa, que se desenvolve nos concellos integrados na Rede de Dinamización Lingüística.