Chévere estrea Eurozone, o seu espectáculo sobre a crise de Europa

“É unha superproducción, a máis ambiciosa da traxectoria de Chévere e tamén polo contexto de crise” asegura Xesús Ron, director de Eurozone. Dous meses de ensaio, oito actores e actrices en escena e 100.000 euros de orzamento son as grandes cifras deste espectáculo para contar “un panfleto teatral sobre a crise de Europa”. A obra estréase esta noite (21:30 horas) no Auditorio da Ramallosa en Teo, onde Chévere é compañía residente. Alí estarán tres semanas, sen ningunha certeza sobre a distribución futura do espectáculo. “Coa Rede Galega de Teatros e Auditorios (RGTA) pechada, a xira xa está cancelada” asegurou Ron na rolda de presentación.