Trala senda do laboratorio de formas

Corría 1963 cando Luís Seoane, co apoio de Isaac Díaz Pardo, redactou un manifesto que “se propuña o estudo das formas desenvolvidas no pasado galego e as que aínda hoxe alentan, herdadas dese paso, o noso presente”. Era a síntese gráfica da nosa cultura e que daría pé a un dos complexos culturais máis emblemáticos da historia: Sargadelos. Agora, a Asociación Galega de Deseñadores quere recuperar ese espírito no marco dunha xornada pensada para dignificar a relevancia do deseño.

Como en Sargadelos, onde o concepto último de forma se materializou en editoriais, museos, unha fábrica de cerámicas e mesmo un fallido proxecto xornalístico, a Asociación Galega de Deseñadores quere evidenciar ese papel vehicular en todo o seu traballo. “Non só facemos produto, senón que tamén nos encargamos da imaxe de marca, da presenza pública dunha entidade” explicaba Manuel del Río, un dos coordinadores das seis mesas de traballo preparadas para este encontro. E non é para menos, o profesor da Universidade de Santiago Elías Torres ten declarado en máis dunha ocasión "Sargadelos é unha empresa cuxos produtos elevaron a autoestima dos galegos". Todo o contrario do que acontece actualmente, porque segundo aprecian os deseñadores, para Suso Vázquez, “notamos a carencia de que o deseño moi poucas veces adquire protagonismo que debera, porque sabemos que concede valor ás empresas e á súa sociedade”.
Esa é a liña de traballo que se pretende para a xornada que se desenvolve esta fin de semana no Centro Galego de Arte Contemporánea (de 10:00 a 20:00 horas) . Non se trata de falar de Sargadelos, senón unha chamada de atención de cómo este aspecto descoidado e menosprezado a día de hoxe, e que resulta ser unha ferramenta importantísima de comunicación.

O debate
A historia do deseño, a súa comunicación, os centros formativos, o contexto da web e mesmo como as administracións públicas se encargan desta cuestión son algunhas das liñas nas que a Asociación de Deseñadores quixo centrar o debate. Seis mesas de traballo para tentar abordar todas as opcións posibles e desenvolver liñas de acción posteriores. Manuel del Río incide neste último aspecto xa que considera que “ a intención de foro é poder debater entre todos iniciativas e ideas que se poidan compilar nun documento pero, sobre todo, poder establecer liñas de traballo posteriores”.

Entre as propostas para o debate hai medidas concretas. Entre elas crear un selo de calidade. “É unha proposta que pensamos importante e que irá en consonancian con establecer un código de boas prácticas” asegura o deseñador Suso Vázquez quen considera que “nun momento no que se imprime bastante, evidenciar que o produto vén de producións sustentables”

Non quedan aí as propostas para o debate, senón tamén evitar que no futuro se produzan logotipos ou campañas desafortunadas. Del Río cita o exemplo máis recente, que é “o do logotipo da candidatura de Madrid 2020 que se coñece popularmente como o das chanclas e que alén da controversia social, ocasionou un manifesto por parte de colectivos de deseñadores”. É dos que pensa que as administracións debe ter en conta cuestións obxectivas á hora de contratar as campañas publicitarias e non depender “das consideracións subxectivas dos políticos de turno”. Os concursos son moitas veces obxectos de críticas por parte destes colectivos que piden unha revisión das súas caracerísticas.

Pero hai máis ideas: conseguir que nas escolas formativas se fale do exemplo do Laboratorio de Formas; elaborar un congreso, exposicións ou ciclo de conferencias coa intención de comunicar a sociedade os traballos e últimas ideas nesta materia… todo iso o sábado 9 de febreiro no CGAC.