Preséntase a Galería de Arte Ayarte, que centrará a súa actividade na rede

Esta primeira exposición será presencial pero é un caso puntual porque o noso obxectivo concéntrase na rede explicaba Javier Ayape, promotor dun novo proxecto que agroma no convulso panorama galerístico actual. Ten como nome Ayarte e consiste nunha proposta de xestión cultural para promover a arte contemporánea mediante a creación de contidos artísticos, encontros, intercambios artísticos ou certames. Como carta de presentación no espazo Portoenorte(rúa do Vilar, 30 Santiago) exhibirán traballo recente do pintor Horacio Peñas (Zamora, 1979).

Malia que se presenta como galería de arte, a súa actividade non só se circunscribe a este sector. Javier Ayape, promotor do espazo epxlica que ten unha orientación para incentivar a arte nas diferentes facetas plásticas, pero tamén haberá oco para a literatura e outras disciplinas. O proxecto está de momento en marcha, a web aínda non está completada de todo e espera incrementar o número de socios da asociación sen ánimo de lucro que está por detrás de todo este proxecto. A nosa intención a curto prazo é colgar no web algún tipo de exposición máis e esperamos facelo con Concha Lagoa, unha artistas da zona de cangas do Morrazo, así como abrir o oco para outros pintores cos que xa contactamos puntualiza.

Neste momento complexo para as galerías de arte, cando outras entidades como Metro en Santiago, anuncian o peche, Ayape defende o seu proxecto argumentando que en época de crise queremos facer un esforzo e incrementar a presenza da arte e da cultura entre a cidadanía.