O CGAC estende a programación actual con varias actividades

Coa programación para 2013 aínda sen confirmar, o Centro Galego de Arte Contemporáneo comeza o ano tirando das exposicións presentes. A curto prazo, ofrecerá visitas guiadas por elas a cargo de profesionais do ámbito cultural e artístico. Non serán as únicas actividades que xiren arredor das mostras actuais, xa que Fernando Casás, artista do que se exhibe unha retrospectiva, estará presente no marco do Seminario: “Arte e subxectividade” que pretende evitar que se cree unha vía única de pensamento sobre o universo artístico. Sobre a exposicion de Casás, tamén haberá un taller experimental de arquitectura. Será en colaboración co Colexio de Arquitectos con quen desenvolverá outro seminario, Sen moverte do sofá, dirixido a nenos para que descobran os parecidos e as diferenzas entre as cidades (a súa historia, estrutura, modelos de crecemento e singularidades) e poidan entender, de xeito global, os lugares que habitamos.