Cotas de share do 21% e unha audiencia media de 175.000 espectadores, Matalobos , a serie de Voz Audiovisual que conta a historia dun clan de narcotraficantes, despídese esta noite da pantalla da TVG. Faino con Non volvas a vista atrás un capítulo que pon fin a cinco temporadas e numerosos premios: Mestre Mateo á mellor serie de televisión en varios anos (2009, 2010 e 2011) ou Premio Circom (2012) á mellor ficción televisiva que concede a organización europea de televisións públicas rexionais.
Aproveitando a boa audiencia da serie, a TVG emitirá ao seu remate (23:20 horas) un programa especial que rememorará os inicios e evolución das personaxes que compoñen o clan Matalobos.
