A Xunta non concreta o seu apoio económico á Real Academia

A Xunta continuará apoiando economicamente a Real Academia Galega, aínda que sen concretar polo momento ningunha contía. Esta é a resposta que daba onte a Consellaría de Cultura ás demandas da RAG, que soliticaba que o Goberno Autonómico compensase a diminución de fondos estatais aos seus orzamentos. O conselleiro, Xesús Vázquez reuníase onte co presidente da RAG, Xosé Luis Méndez Ferrín e o secretario desta institución, Xosé Luis Axeitos, nun encontro no que tamén participaron os secretarios xerais de Política Lingüística e de Cultura, Valentín García e Anxo Lorenzo.

Ferrín sinalou que a entidade que preside necesita un mínimo de 800.000 euros para garantir a súa supervivencia, e adiantou que de non conseguir fondos suficientes, a entidade podería iniciar un expediente de regulación de emprego ou fechar a súa biblioteca ou o arquivo.