A raíz das recentes sentencias do Tribunal Superior de Xustiza sobre o Decreto para Plurilingüismo, a plataforma Queremos Galego anunciou un novo calendario de mobilizacións. Segundo anunciaban esta mañá representantes do colectivo, unha recollida de sinaturas solicitará apoio a un manifesto que solicita a derrogación inmediata do texto. Ademais, reclámase a implantación dunha nova norma que garanta a presenza do galego en educación infantil e unha presenza mínima do 50% a partir dese ciclo, tal e como prevé o Plan Xeral de Normalización Lingüística.
Para o vindeiro 12 de decembro ás 12 da mañá, a plataforma convoca a unha concentración diante da sede da Xunta de Galicia e para o vindeiro 27 de xaneiro chama a unha manifestación en Compostela.
