Jesús Vázquez repite como Conselleiro de Cultura, Educación e Ordenación Universitaria

Esta fin de semana o presidente da Xunta, Alberto Núñez Feijoo, daba a coñecer a composición do seu equipo de goberno. A súa estrutura orgánica permanece igual e só un cambio no titular dun departamento, que afecta á consellaría de Economía e Industria, onde Francisco Conde substitúe a Javier Guerra. No que atende ao sector cultural as súas competencias mantéñense na Consellaría de Cultura, Educación e Ordenación Universitaria onde Jesús Vázquez continúa como titular. Entre as actuacións máis urxentes deste departamento pasa por nomear ao futuro director de Agadic, posto que segue vacante tralo cese de Juan Carlos Fernández Fasero.

Os retos da IX lexislatura pasan por continuar o modelo definido no Plan Gaiás para o complexo da Cidade da Cultura. No que atende a lingua, están pendentes de saír novas sentenzas sobre o Decreto para o Plurlingüísmo no Ensino, logo de que o Tribunal Superior de Xustiza de Galicia invalidara dous artigos que afectaban a consulta aos pais sobre a lingua a empregar na aula (o 5.3) e outro no que se lle outorga ao alumnado o dereito a falar e escribir na lingua da súa elección (12.3) porque "non se axustan a legalidade".

No debate previo á sesión de investidura, Alberto Núñez Feijoo anunciou un plan para o audiovisual que se deberá concretar na presente lexislatura. Anxo Quintanilla será o responsable da política audiovisual, logo de que as competencias se concentraran en Agadic trala eliminación do Consorcio Audiovisual de Galicia. Todas estas actuacións deberán enmarcarse no contexto de crise e económica e de redución orzamentaria.